ලෝකයේ වැඩිම වැටුප් පැකේජය ඊලෝන් මස්ක්ට? ට්‍රිලියනයක කතාව!

සාමාන්‍යයෙන්, සමාගමක අලෙවිය සහ ලාභය පහත වැටී, අලුත් නිෂ්පාදනයක්ද අසාර්ථක වුවහොත්, එම විධායක නිලධාරියාට නව රැකියාවක් සොයන්නට සිදුවීම සාමාන්‍ය දෙයකි. නමුත්, ටෙස්ලා සමාගමේ ප්‍රධාන විධායක නිලධාරී ඊලෝන් මස්ක්ට නම් මේ කතාව හාත්පසින්ම වෙනස්. ඔහුට ආයතනික ඉතිහාසයේ මෙතෙක් ලැබුණු විශාලතම වැටුප් පැකේජය ලැබීමට නියමිත බවට මේ දිනවල ලෝකය පුරාම කතාබහට ලක්ව තිබෙනවා. පසුගිය සතියේ ටෙස්ලා සමාගම විසින් නිකුත් කරන ලද වාර්තාවක දැක්වෙන්නේ, මස්ක් මහතාට ඩොලර් ට්‍රිලියනයක් පමණ වටිනා වැටුප් පැකේජයක් ලබා දීමට යෝජනා වී ඇති බවයි. මෙය බොහෝ දෙනෙකුට විශ්වාස කිරීමට අපහසු කරුණක් වන්නේ, සමාගම මේ වන විට අලෙවියෙන් සහ ලාභයෙන් යම් පසුබෑමකට ලක්ව ඇති පසුබිමක මෙවැනි දැවැන්ත ගෙවීමක් සිදු කිරීමට යෝජනා වීමයි. ටෙස්ලා අධ්‍යක්ෂ මණ්ඩලයේ සභාපතිනි රොබින් ඩෙන්හෝම් මහත්මිය නිව්යෝර්ක් ටයිම්ස් පුවත්පතට ලබා දුන් සම්මුඛ සාකච්ඡාවකදී මෙම තීරණය දැඩි ලෙස ආරක්ෂා කර තිබෙනවා. ඇය පවසා ඇත්තේ, ඊලෝන් මස්ක් යනු ‘කළ නොහැකි ඉලක්ක’ මගින් මෙහෙයවන විට ලෝකය වෙනස් කළ හැකි තාක්ෂණයන් ලබා දීමට සමත් පුද්ගලයෙකු බවයි. ‘ඕනෑම වැටුප් සැලැස්මක් සකස් කිරීමේදී, ඔබ පෙළඹවීමට උත්සාහ කරන පුද්ගලයා පෙළඹවීමට හේතුව කුමක්දැයි සොයා බැලිය යුතුයි. ඊලෝන් සම්බන්ධයෙන්, එය වෙන කිසිවෙකු කර නොමැති දේවල් කිරීමයි’ යනුවෙන් ඇය වැඩිදුරටත් සඳහන් කර තිබෙනවා. අධ්‍යක්ෂ මණ්ඩලයේ වසර 11ක් තුළ සම්මුඛ සාකච්ඡා කිහිපයක් පමණක් ලබා දී ඇති ඩෙන්හෝම් මහත්මිය, මස්ක් මහතාට ‘මුන්ෂොට්’ (moonshot) අරමුණු මාලාවක් සාක්ෂාත් කරගතහොත් ඩොලර් ට්‍රිලියනයක් පමණ වටිනා කොටස් ලබා දිය යුතු බවට ආයෝජකයින්ට ඒත්තු ගැන්වීමේ ප්‍රධාන ප්‍රකාශිකාව බවට පත්ව සිටිනවා. මෙම වැටුප් පැකේජය සම්බන්ධයෙන් කොටස් හිමියන් නොවැම්බර් මාසයේදී වාර්ෂික රැස්වීමකදී ඡන්දය ප්‍රකාශ කිරීමට නියමිතයි. මේ දැවැන්ත තීරණය ගැන ලෝකයම බලා සිටින්නේ කුතුහලයෙන්!