ශ්රී ලංකාවේ අධිකරණ පද්ධතිය නව යුගයකට පිවිසෙමින්, ඩිජිටල්කරණ වැඩසටහනක් දියත් කර තිබෙනවා. අධිකරණ සේවා කොමිෂන් සභාවේ සාමාජික ශ්රේෂ්ඨාධිකරණ විනිසුරු මහින්ද සමයවර්ධන සහ ශ්රේෂ්ඨාධිකරණ විනිසුරු එස්. තුරෙයිරාජා යන මහත්වරුන්ගේ ප්රධානත්වයෙන් මෙම සුවිශේෂී පද්ධතිය දියත් කිරීම සිදු විය. මෙම වැඩසටහනේ ප්රධාන අරමුණු වන්නේ, අධිකරණ කාර්යාල තුළ සිදුවන දූෂණ හා අක්රමිකතා අවම කිරීම, මහජනතාවගේ අධිකරණ කෙරෙහි ඇති විශ්වාසය තහවුරු කිරීම සහ ජනතාවට මෙන්ම නීතිඥවරුන්ට කඩිනම් හා කාර්යක්ෂම සේවාවක් ලබා දීමයි. පළමු අදියර යටතේ ශ්රේෂ්ඨාධිකරණය සම්පූර්ණයෙන්ම ඩිජිටල්කරණය කරන අතර, පසුව අභියාචනාධිකරණය, මහාධිකරණ, දිසා අධිකරණ සහ මහේස්ත්රාත් අධිකරණ ඇතුළු සෙසු සියලුම අධිකරණ පද්ධතියට මෙම නවීකරණ ක්රියාවලිය ව්යාප්ත කිරීමට නියමිතයි. ඩිජිටල් ආර්ථික කටයුතු පිළිබඳ ජනාධිපති උපදේශක ආචාර්ය හාන්ස් විජයසූරිය මහතා මෙම අවස්ථාවේ ප්රධාන දේශනය පවත්වමින් මෙම වැඩසටහනේ වැදගත්කම අවධාරණය කළා. මීට අමතරව, අධිකරණ දඩ, නඩු ගාස්තු, මුද්දර ගාස්තු සහ සහතික පිටපත් ගාස්තු වැනි සියලුම ගෙවීම් බැංකු කාඩ්පත් මඟින් සිදු කිරීමේ නව පහසුකම් ද හඳුන්වා දී තිබෙනවා. මේ යටතේ, කොළඹ අවට පිහිටි අධිකරණ කිහිපයක් සඳහා අදාල ගෙවීම් යන්ත්ර බෙදා දීම ද සිදු විය. මේ හරහා මහජනතාවට වඩාත් පහසුවෙන් හා විනිවිදභාවයෙන් යුතුව අධිකරණ කටයුතු සිදු කර ගැනීමේ අවස්ථාව ලැබෙනු ඇතැයි අපේක්ෂා කෙරේ.
