ගම්පොළ රාජ්‍ය ඉඩම් වංචාව: මන්ත්‍රීවරයෙකුට අධිකරණයෙන් රතු එළියක්!

ගම්පොළ නගර මධ්‍යයේ පිහිටි රජයට අයත් පර්චස් 129ක වටිනා ඉඩමක සහ එහි වූ ගොඩනැගිලි තුනක අනවසරයෙන් රැඳී සිටි බවට චෝදනා ලැබූ පාර්ලිමේන්තු මන්ත්‍රී අනුරාධ ලංකා ජයරත්න මහතා එම ස්ථානයෙන් ඉවත් කරන ලෙස ගම්පොළ දිසා අධිකරණය නියෝග කර තිබෙනවා. මෙම ආන්දෝලනාත්මක නියෝගය ඉකුත් සැප්තැම්බර් 27 වන දින ගම්පොළ දිසා විනිසුරු දුමින්ද මුදුන්කොටුව මහතා විසින් ලබා දී ඇත. 2001 වසරේ සිටම අනවසරයෙන් භුක්තියට නතුව තිබූ මෙම ඉඩමට රාජ්‍ය වියදමින් ඉදිකරන ලද සංස්කෘතික මධ්‍යස්ථානයක්ද අයත් වීම කැපී පෙනෙන කරුණක්. අධිකරණ නියෝගය ක්‍රියාත්මක කිරීමට නිලධාරීන් එම ස්ථානයට ගිය අවස්ථාවේදී මන්ත්‍රීවරයා එහි නොසිටි අතර, ඒ වෙනුවට ‘ගම්පොළ ජාතික උරුමය’ නම් සංවිධානයක් සමඟ බදු ගිවිසුමකට එළඹ එම ස්ථානය ව්‍යාපාරික කටයුත්තක් සඳහා භාවිත කළ පුද්ගලයෙකු එහි සිට ඇති බවට වාර්තා වේ. 2017 වසරේදී ඇතිකරගත් එම ගිවිසුම අනුව, අදාළ සංවිධානය විසින් මාසිකව රුපියල් 40,000ක කුලියක් අය කරගෙන ඇති අතර, මේ වන විට එම ආදායම රුපියල් ලක්ෂ 40කට ආසන්න වී ඇත. කෙසේ වෙතත්, මෙම විශාල මුදල රජයට ලැබී නැත. 2001 සිට 2023 දක්වා උඩපළාත ප්‍රාදේශීය ලේකම් ධුරය දැරූ නිලධාරීන් පොදු දේපළ අවභාවිතයට එරෙහිව ක්‍රියාමාර්ග නොගෙන මෙම අපහරණයට ආධාර අනුබල දී ඇති බවටද තොරතුරු හෙළි වී තිබේ. මෙම නිලධාරීන් දෙදෙනෙකු මේ වනවිට මහනුවර සහ නුවරඑළිය දිස්ත්‍රික්කවල ඉහළ පරිපාලන තනතුරු දරන බව සඳහන් වීම තත්ත්වය තවත් බරපතල කරයි. අදාළ රාජකාරී වගකීම ඉටු කරමින්, අංගම්මන බටහිර ග්‍රාම නිලධාරිවරයා විසින් මෙම ඉඩමේ සහ ගොඩනැගිලිවල හිමිකම නැවත රජයට පවරාගෙන ඇත.