TikTok සමාජ මාධ්‍ය වේදිකාවේ නියෝජිත පිරිසක් සහ අග්‍රාමාත්‍ය ලේකම් ප්‍රදීප් සපුතන්ත්‍රි මහතා අතර වැදගත් හමුවක් ඊයේ (ජූලි 16) අග්‍රාමාත්‍ය කාර්යාලයේදී පැවැත්වුණා. මෙම සාකච්ඡාවේ ප්‍රධාන අරමුණ වූයේ විනෝදාස්වාදයෙන් ඔබ්බට ගොස්, TikTok ඩිජිටල් මෙවලමක් ලෙස ශ්‍රී ලංකාවේ ආර්ථික අවස්ථා පුළුල් කිරීමට සහ අධ්‍යාපන කටයුතු සඳහා භාවිත කළ හැකි ආකාරය පිළිබඳව අවධානය යොමු කිරීමයි.
අග්‍රාමාත්‍ය මාධ්‍ය අංශය නිකුත් කළ නිවේදනයේ දැක්වෙන්නේ, ඩිජිටල් අධ්‍යාපනය පිළිබඳ දැනුම ලබා දීම සඳහා අවශ්‍ය විධිවිධාන, පර්යේෂණ සහ විෂයමාලාවට අවශ්‍ය සංශෝධන ඇතුළත් කිරීමේ වැදගත්කම TikTok නියෝජිතයින් විසින් පෙන්වා දුන් බවයි. එසේම, ඩිජිටල් තාක්ෂණය වගකීමෙන් යුතුව භාවිත කිරීම සහ TikTok හරහා ආර්ථික අවස්ථා නිර්මාණය කිරීමේ වැදගත්කම ද මෙහිදී අවධාරණය කෙරුණා.
අධ්‍යාපන ක්ෂේත්‍රයේ දැනටමත් සිදුවෙමින් පවතින ප්‍රතිසංස්කරණ සමඟ මෙවැනි සහයෝගිතාවන් අගය කළ අග්‍රාමාත්‍ය ලේකම් ප්‍රදීප් සපුතන්ත්‍රි මහතා, ඩිජිටල්කරණ ක්‍රියාවලිය කඩිනමින් ක්‍රියාත්මක කිරීමේ අවශ්‍යතාව මෙහිදී වැඩිදුරටත් අවධාරණය කර තිබුණා.
මෙම සාකච්ඡාවට දකුණු ආසියාවේ TikTok සමාගමෙහි රාජ්‍ය සම්බන්ධතා ප්‍රධානී සහ දකුණු ආසියාවේ මහජන කටයුතු ප්‍රධානී ෆෙඩ්රෝස් අල් මොටකින් (Ferdous Al Mottakin) සහ අග්‍රාමාත්‍ය අතිරේක ලේකම්වරුන් ඇතුළු පිරිසක් සහභාගී වී සිටියා.
මෙම හමුව, ශ්‍රී ලංකාවේ ඩිජිටල් පරිවර්තනය වේගවත් කිරීමට සහ අධ්‍යාපනික හා ආර්ථික සංවර්ධනයට තාක්ෂණය උපයෝගී කර ගැනීමට ඇති අවස්ථා පිළිබඳව නව බලාපොරොත්තු ඇති කරවන සාධාරණ පියවරක් ලෙස සැලකිය හැකියි.
