හිටපු අමාත්‍ය රාජිත සේනාරත්න මහතා සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව විසින් ඊයේ (ජූලි 11) කොළඹ මහේස්ත්‍රාත් අධිකරණයට වැදගත් කරුණු රැසක් වාර්තා කර තිබේ. ඒ මහතා නිවසින් බැහැරව ගොස් දුරකථනයද විසන්ධි කර ඇති බවට කොමිසම විසින් අධිකරණයට දැනුම් දී ඇත.
රාජිත සේනාරත්න මහතාට එල්ල වී ඇති ප්‍රධාන චෝදනාව වන්නේ, නීතිමය ක්‍රියාපටිපාටියෙන් බැහැරව, කිරින්ද ධීවර වරායේ වැලි කැණීම් ව්‍යාපෘතියක් කොරියානු සමාගමකට ලබා දීමෙන් රජයට රුපියල් ලක්ෂ 262කට අධික පාඩුවක් සිදුකිරීමයි. මෙම චෝදනාව මත ඒ මහතා සැකකරුවෙකු ලෙස නම් කර තිබේ.
අල්ලස් කොමිසමේ නිලධාරීන් අධිකරණයට වැඩිදුරටත් දැන්වූයේ, අදාළ විමර්ශනය සඳහා ප්‍රකාශයක් ලබා දෙන ලෙස අවස්ථා කිහිපයකදීම දැනුම් දුන්නද, ඒ මහතා විවිධ අසත්‍ය හේතු ඉදිරිපත් කරමින් එය මඟහරිමින් සිටින බවයි. නීතිඥයෙකු මඟින් ඉදිරිපත් කර ඇති වෛද්‍ය වාර්තාවකට නීතිමය වශයෙන් පිළිගැනීමක් නොමැති බවද කොමිසම එහිදී අවධාරණය කළේය.
විමර්ශන මඟහරිමින් සිටින සැකකරු අත්අඩංගුවට ගැනීම සඳහා වරෙන්තුවක් නිකුත් කරන ලෙස අල්ලස් කොමිසම අධිකරණයෙන් ඉල්ලා සිටියේය. මෙහිදී කොළඹ අතිරේක මහේස්ත්‍රාත් හර්ෂණ කැකුණවෙල මහතා පෙන්වා දුන්නේ, එවැනි නියෝගයක් නිකුත් කිරීමට පෙර ඊට අදාළ ලේඛන (විශේෂයෙන් වෛද්‍ය වාර්තා) අධිකරණයේ අවධානයට යොමු කිරීමේ අවශ්‍යතාවයයි. එලෙස පරීක්ෂා කිරීමකින් තොරව වරෙන්තුවක් නිකුත් කළ නොහැකි බවද මහේස්ත්‍රාත්වරයා අවධාරණය කළේය.
කෙසේ වෙතත්, මෙම සිද්ධියට සම්බන්ධ සැකකරුවන් අත්අඩංගුවට ගැනීමට අල්ලස් කොමිසමට නීතිමය බාධාවක් නොමැති බව ද මහේස්ත්‍රාත්වරයා ප්‍රකාශ කළේය. එම බලතල උපයෝගී කර ගනිමින් මෙම සැකකරු අත්අඩංගුවට ගැනීමට හැකියාව පවතින බවද මහේස්ත්‍රාත්වරයා සඳහන් කළේය. අල්ලස් කොමිසමේ නිලධාරීන් කියා සිටියේ, මෙම ඉල්ලීම අවශ්‍ය ලේඛන සහිතව ඉදිරියේදී අධිකරණයට ඉදිරිපත් කරන බවයි.
1994 අංක 20 දරණ අල්ලස් පනත ප්‍රකාරව දූෂණය නැමැති වරද යටතේ රාජිත සේනාරත්න මහතා අත්අඩංගුවට ගෙන අධිකරණය වෙත ඉදිරිපත් කිරීමට නියමිත බවට වාර්තා වේ
