කුරුණෑගල, මාවතගම මධ්‍ය මහා විද්‍යාලයේ සහ ත්‍රිකුණාමලය ශ්‍රී කෝණේශ්වර හින්දු විද්‍යාලයේ සිසු සිසුවියන්ට ඔවුන්ගේ අධ්‍යාපන චාරිකාවට සමගාමීව, ජනාධිපති ලේකම් කාර්යාලය විසින් සංවිධානය කරනු ලබන ‘Vision’ වැඩසටහනට ඊයේ (ජූලි 11) සහභාගී වීමට අවස්ථාව උදා විය. මෙම සුවිශේෂී වැඩසටහන, ජනාධිපති කාර්යාලය, අධ්‍යාපන අමාත්‍යාංශය සහ පාර්ලිමේන්තු ජනසන්නිවේදන අංශය එක්ව පාසල් සිසුන්ගේ දැනුම හා දැක්ම පුළුල් කිරීමේ අරමුණින් ක්‍රියාත්මක වේ.
‘Vision’ වැඩසටහන යටතේ, ‘ක්ලීන් ශ්‍රී ලංකා’ (Clean Sri Lanka) වැඩසටහන පිළිබඳව සහ එහි සංකල්පීය වටිනාකම පිළිබඳව සිසු සිසුවියන් දැනුවත් කිරීමක් ද සිදු කෙරුණි. පරිසර සංරක්ෂණයේ වැදගත්කම තහවුරු කරමින්, වැඩසටහනට සමගාමීව සංකේතාත්මක තිළිණයක් ලෙස පාසල් වෙත වටිනා පැළ ප්‍රදානයක් ද සිදු කරනු ලැබීය.
සිසු සිසුවියන් වෙනුවෙන් හරවත් දේශනයක් සිදු කරමින් මහාචාර්ය ගෝමික උඩුගමසූරිය මහතා මෙහිදී අවධාරණය කළේ, එක් විෂය ක්ෂේත්‍රයකට පමණක් සීමා නොවී, සෑම ක්ෂේත්‍රයකම අත්හදා බැලීම් සිදු කරමින් නව නිපැයුම් කෙරෙහි කුඩා කල සිටම හුරු පුරුදු විය යුතු බවයි. එතුමා තවදුරටත් කියා සිටියේ, තම ජීවිතයේ සෑම අත්දැකීමක්ම පර්යේෂණයට ලක් කිරීම තුළින් ජීවිතයේ අභියෝග ජයග්‍රහණය කළ හැකි බවයි.
මෙම වැඩසටහනට ජනාධිපති ජ්‍යෙෂ්ඨ අතිරේක ලේකම් කේ. එන්. එම්. කුමාරසිංහ මහතා, ජනාධිපති කාර්යාලයේ ත්‍රිවිධ හමුදා සම්බන්ධීකරණ ඒකකයේ අධ්‍යක්ෂ එයාර් කොමදෝරු ආසිරි ගාල්ලගේ මහතා, එහි සහකාර අධ්‍යක්ෂ මේජර් නදීක දංගොල්ල මහතා, මාවතගම මධ්‍ය මහා විද්‍යාලයේ සහ ශ්‍රී කෝණේශ්වර හින්දු විද්‍යාලයේ ගුරු මහත්ම මහත්මීන් ඇතුළු පිරිසක් සහභාගි වූහ.
‘Vision’ වැඩසටහන මගින් පාසල් සිසුන්ගේ දැනුම පුළුල් කරමින්, රටේ අනාගතය සඳහා නව දැක්මක් සහ ප්‍රායෝගික කුසලතා වර්ධනය කිරීමට අරමුණු කර ඇති බව පැහැදිලිය.
