කැලිෆෝනියාවෙන් වාර්තා වන හද කම්පා කරවන පුවතක් මේ දිනවල මුළු ලෝකයම කතාබහට ලක්වී තිබෙනවා. මවකගේ නොසැලකිල්ල නිසා, රූපලාවන්ය සත්කාරයක් ලබා ගැනීමට ගොස් තම එක් හැවිරිදි පුංචි පුතු උණුසුම් මෝටර් රථයක් තුළ දමා යාමෙන් ජීවිතක්ෂයට පත්වීමේ ශෝකජනක සිදුවීමක් වාර්තා වෙනවා.
බේකර්ස්ෆීල්ඩ් පොලීසිය කියන විදිහට, මේ සිදුවීමට මුහුණ දීලා තියෙන්නේ මායා හර්නැන්ඩස් කියන අම්මා. පසුගිය ජුනි 29 වැනිදා ඇය තම එක හැවිරිදි සහ දෙහැවිරිදි පුතුන් දෙදෙනාව වාහනයේ පිටුපස අසුන්වල පටිවලින් බැඳ, රූපලාවන්ය සායනයක් ඉස්සරහ නවත්තලා ගිහින් තිබෙනවා.
මේ සිදුවීමෙන් දෙහැවිරිදි දරුවා වාසනාවකට බේරිලා තිබුණත්, අවාසනාවන්ත ලෙස අමිලියෝ ගුටරේස් නම් එක් හැවිරිදි දරුවාගේ ජීවිතය බේරගන්න ලැබිලා නැහැ. දරුවා රෝහලට ගෙන යනකොට ඔහුගේ සිරුරේ උෂ්ණත්වය ෆැරන්හයිට් අංශක 107ක් තරම් අධික වෙලාලු තිබිලා තියෙන්නේ.
මියගිය දරුවාගේ මිත්තණිය වන කේටී මාර්ටිනස්, මේ සිදුවීම ගැන කතා කරනකොට දැඩි කම්පනයකින් සහ වේදනාවකින් තමයි හිටියේ. “ඒ පොඩි දරුවන්ට නැගිටලා තමන්ව බේරගන්න කිසිම විදිහක් තිබුණේ නැහැ. ඇය දරුවන්ව ළමා ආසනවලට දාලා, දොරවල් අගුළු දාලා වහලා ගිහින් තිබුණා,” කියලා ඇය කියනකොට ඇගේ හඬ වෙව්ලලා ගිහින්.
තමන්ගේ මුණුබුරන් විඳින්න ඇති දරුණු වේදනාව තේරුම් ගන්න උත්සාහ කරමින්, මිත්තණිය කියන්නේ, තමන් පවා වාහනයේ වායු සමීකරණය ඕෆ් කරලා, ජනෙල් වහලා ඇතුළේ ටිකක් වෙලා හිටියා කියලා. ඒ තරම් ඇය මේ වේදනාවෙන් පීඩා විඳිනවා.
අත්අඩංගුවට ගැනීමේ වාර්තාවලට අනුව, මේ අම්මා පොලීසියට කියලා තියෙන්නේ වාහනයේ වායුසමීකරණය දාලා ආවා කියලා. හැබැයි පොලීසිය කරපු පරීක්ෂණවලින් හෙළිවෙලා තියෙන්නේ, ඒ වාහනේ එන්ජිම පැයකට පස්සේ ඔටෝමැටිකලි ඕෆ් වෙන සිස්ටම් එකක් තියෙන එකයි. ඒ කියන්නේ, මේ අහිංසක දරුවෝ අඩුම තරමේ විනාඩි 90ක් විතර වායුසමීකරණය නැතුව, ඒ අධික උෂ්ණත්වය සහිත වාහනේ ඇතුළේ හිරවෙලා ඉඳලා තියෙනවා.
රූපලාවන්යාගාරයේ සේවිකාවක් පොලීසියට කියලා තියෙන්නේ, ලිප් ට්රීට්මන්ට් එකකට එනකොට දරුවන්ව ගේන්න පුළුවන්ද කියලා හර්නැන්ඩස් කලින් අහලා තිබුණත්, එයා ආපු වෙලාවේ දරුවන්ව අරන් ආවා කියලා කිසිම දෙයක් කියලා නැහැලු. ඒත් මේ අම්මාගේ හැසිරීම සාමාන්යයෙන් එහෙම නෙවෙයි, ඇය දරුවන්ට හරිම ආදරෙන් හිටපු අම්මා කෙනෙක් කියලා මිත්තණිය කියන්නේ.
මේ නොසැලකිලිමත් මිනීමැරුමක් සහ ළමා අපයෝජන චෝදනා යටතේ හර්නැන්ඩස්ට නඩු පවරලා තියෙනවා. ඇය දැන් ඩොලර් මිලියනයකට අධික ඇපයක් මත රඳවාගෙන ඉන්නවා. දරුවන්ගේ තාත්තාට මේ ඛේදවාචකය ගැන ආරංචි වෙලා තියෙන්නේ එයා වෙන චෝදනාවකට හිරේ ඉන්න නිසා, සිද්ධියෙන් පස්සේ දවසේ පූජකවරයෙක් හරහාලු.
මියගිය අමිලියෝ පුංචි දරුවා සිහිපත් කරමින් පසුගිය සෙනසුරාදා ප්රාදේශීය උද්යානයකදී අනුස්මරණ වැඩසටහනකුත් පවත්වලා තිබුණා. මේ වගේ සිදුවීම් ආයෙත් සිද්ධ නොවෙන්නට අපි හැමෝම ප්රවේශම් වෙමු!
