කවුරුත් දන්නවා චාමර වීරසිංහ තවමත් රෝහල්ගතව ඉන්නේ කියලා.
ඉතිං ඔහු නැතුව සංගීත වේදිකා පාලුවට ගිහිං.
හදවතේ ගායන ශිල්පී චාමර වීරසිංහ සුව වෙන්න කියලා ඔහුගේ රසික රසිකාවියන් මේ වන විට බෝධි පූජාත් තියනවා.
හැමෝගෙම බලාපොරොත්තුව චාමර ඉක්මනට සුවය ලබන්න කියලා.
චාමරගේ අසනීප තත්ත්වයත් සමග ඔහුගේ කලා ක්ෂේත්‍රයේ ඉන්න යාලුවෝ බොහෝ දෙනෙක් ඉක්මන් සුවය ප්‍රාර්ථනා කරලා තියනවා.
මේ , ෆ්ලෑෂ්බෑග් සංගීත කණ්ඩායමේ නායක රොෂාන් ප්‍රනාන්දු පළ කළ අදහසක්.
“මතකයි මීට අවුරුදු 20 කට විතර කලින් රංජිත් ප්‍රේමලාල් මහතා ( රන්සිළු කැසට් නිෂ්පාදක ) මට දුරකථනයෙන් කථාකරල මෙහෙම කිව්වා, “රොෂාන් මට මරු කොල්ලෙක් හම්බුනා, හොද හඬක් තියනවා, මම මිනිහව ඔයා ලඟට එවනවා කටහඩ පොඩ්ඩක් බලලා ඉක්මනින් හොද සින්දුවක් හදන්න”. ඔන්න දවසක් තරුණ හීන්දෑරි කොල්ලෙක් උදේ පාන්දර අපේ ගේ ඉස්සරහ මාව හම්බවෙන්න ඇවිත් මට කියනවා ” රංජිත් ප්‍රේමලාල් මහත්තයා කිව්වා මට ගිහින් ඔයාව හම්බෙන්න කිව්වා ” කියල. එදා මම ඔහුව ශබ්දාගාරයට රැගෙන ගොස් තමන් කැමති ගීතයක් ගායනා කරන්න කියල කිව්වම, මට මතකයි එදා ඔහු ගායනා කලේ වේරලියද්ද මහත්මයාගේ සින්දුවක්. ඒක ඔහු රහට කිව්වා. ඊට පස්සේ ඔහු වෙනුවෙන් මගේ අතින් නිර්මාණය වූ පළමු ගීතය තමයි අවන්ත ප්‍රනාන්දු රචනා කල ” බැද්දට සඳ වගේ ” ගීතය (ශබ්ද පරිපාලක සුනෙත් කැලුම් සිහිපත් කලයුතුයි). ඉන් අනතුරුව ගීත ගණනාවක් මට ඔහු වෙනුවෙන් නිර්මාණය කිරීමට හැකියාව ලැබුනා . ජනතාවගේ ආදරය දිනාගත් “චාමර වීරසිංහ” නම් දැවැන්ත චරිතය මෙලෙස බිහි කිරීමේ පුර්ණ ගෞරවය හිමි විය යුතු පුද්ගල නාමය වන්නේ රංජිත් ප්‍රේමලාල් මහතායි. ඔහු චාමර හැදුවේ සැලසුමකට අනුව, අද ඒ සැලසුම අතිසාර්ථකයි.(ඔහු වෙනුවෙන් ගීත රචනා කල, සංගීත නිර්මාණය කල සියළු දෙනාත් සිහිපත් කිරීමට කැමතියි) ඒ වගේම තවමත් රසිකයන් නොඇසූ නවතම ගීත දාහතරක් ද ඔහු සතුයි. ඉතිං මට මේ සටහන තියන්න හිතුනෙ මේ වටිනා මනුස්සයා අද අසනීප තත්වයෙන් පසුවන නිසාත්, කලාකරුවෙකු ජනතා අයිතියට පත් වීමෙන් පසු නිතැතින්ම ඔහු අයිති ජනතාවට බැවින් කලාකරුවෙක් වශයෙන් ඔහු ජනතාව වෙනුවෙන් පරිස්සම් විය වියයුතු බවත් සිහිපත් කිරීමටයි.
චාමර , ඔයා එනකන් සිය දහස් ගණන් රසිකයින් බලාගෙන ඉන්නවා, වේදිකාව පාළුයි, ඉක්මනින් සනීප වෙලා එන්න. දෙවි පිහිටයි 🙏”
