සමුගත් සොඳුරු හිතවතා ජැක්සන් ගැන එඩ්වඩ් ජයකොඩි තැබූ සටහන

සොඳුරු මතක ඉතිරි කරමින් සමුගත් ප්‍රවීණ රංගධර ජැක්සන් ඇන්තනී මහතා පිළිබඳව මතකයන් අවදි කරමින් එඩ්වඩ් ජයකොඩි මහතා ඕස්ට්‍රේලියාවේ සිට ෆේස්බුක් සටහනක් තබා තිබෙනවා

එම සටහන පහතින් කියවිය හැකියි

ජැක්සන් සහ මා හමුවුණු හැමවිටම අප එකිනෙකා ගේ ආමන්ත්‍රණය හරිම ආශ්වාදයක් ගෙනදුන්නා.
ඔහු මා ඇමතූයේ E.Jayakody වශයෙනි.
මා ඔහු ඇමතූයේ යේ J.Anthony නමිනි.
මචං J.Anthony.
උඹ ස්වර්ගස්ථ වුණු පුවත කණ වැකුණාම මටත් චරිතාටත් දැනුණු දැඩි සංවේදනාව සංවේගය මෙතෙකැයි කියා තක්සේරු කරන්න අපහසුයි.
අත-පයේ ඇඟිලි ගණනටත් අඩු සුළුතරයක් හැරෙන්නට
මුලු රටම උඹට ආදරෙයි මචං.
මුළින්ම එඩ්වඩ් – ජැක්සන් හමුව වේදිකා නාට්‍ය ලෝකයේ.
එහිදී අප මාර මාර දේවල් කළා.
දෙපානෝ හා මධුර ජවනිකා ද
අයිවර් ඩෙනිස් ගුරු පියාණන්ගේ විවිධ පටිගත කිරීම් සහ සංගීතාංග ද
ඒ අතරින් විශේෂයි.
උඹ ගැන බොහෝ හැදෑරීමක් කරන්න මට අවස්ථාව ලැබුණේ වෙනම තැනක.
ඒ වසර ගණනාවක් පුරා
උඹත් – මාත් – යශෝදාත්
විනිශ්චය මණ්ඩලයේ රැඳුණු රණවිරු රියල් ස්ටාර් රූපවාහිනී රියැලිටියේ ගෙවූ කාලය.
උඹේ දැනුම හැසිරවීම
උඹේ කියැවීම විහිදුවාලීම
රණවිරුවන් හා රට ගැන උඹේ සාධනීය ආකල්ප
මේ සියල්ලක් ගැනම මං උඹෙන් ඉගෙන ගත්තේ නොනිල සිසුවෙක් විදියට.
චරිතාත් මාත් මේ වනවිට ඔස්ට්‍රේලියාවේ.
උඹ ළඟට දිව එන්න බැහැ වෙනදා වගේ.
උඹ මැරුණා කියල තවමත් මට හිතෙන්නෙ නැහැ.
එහෙම හිතුවොත් අපට අහිමිවෙන්නෙ
1
කියවා නිම කළ නොහැකි මහා පුස්තකාලයක්.
2
උගන්වා නිම කළ නොහැකි මහා ඉතිහාසයක්.
3
රසවිඳ නිමා කළ නොහැකි කලා හා සංස්කෘතික මහා පරිච්ඡේදයක්.
උඹට සුබ ගමන්
J.Anthony මචෝ.
මං
E.Jayakody.
(චරිතා ගේ ආදරයද සමග)