ශ්‍රී ලංකාව සහ බටහිර ඉන්දීය කොදෙව් කණ්ඩායම් අතර පළමු ටෙස්ට් ක්‍රිකට් තරගය ගාල්ල ජාත්‍යන්තර ක්‍රිකට් ක්‍රිඩාංගණයේදී ආරම්භ වීම ත් සමග ගාල්ල කොටු පවුර නැරඹීමට පැමිණි සංචාරකයින්ව ආපසු හරවා යැවීමට පොලිසිය පියවර ගෙන තිබේ.
මේ හේතුවෙන් දේශීය මෙන් ම විදේශීය සංචාරකයින් විශාල පිරිසක් අපහසුතාවට පත්ව සිටි බව වාර්තා වෙයි.
සංචාරකයින් බොහෝ දෙනෙකුට මේ හේතුවෙන් කොටු පවුර මතට ගොඩවීමට නොහැකි වූ අතර මේ සම්බන්ධයෙන් රැකවලෙහි සිටි පොලිස් නිලධාරියෙකුගෙන් විමසූ විට කියා ඇත්තේ , තමන් ඒ සම්බන්ධයෙන් කිසිවක් නොදන්නා අතර උසස් පොලිස් නිලධාරින්ගේ උපදෙස් පරිදි ජාත්‍යන්තර ක්‍රිකට් ක්‍රීඩාංගණය ඉදිරිපස කොටු පවුර මතට කිසිවෙකුට ත් යාමට ඉඩ නොදෙන බව ය.
අනුරාධපුරයේ සිට පැමිණි පිරිසක් කියා සිටියේ, තම දරුවන් ද සමග ගාලු කොටුව නැරඹීමට පැමිණිය ත් මෙම ස්ථානයට යාමට පොලිසිය ඉඩ නොදුන් බව ය.
මේ අතර විදේශීය සංචාරකයින් පිරිසක් ද කියා සිටියේ, තමන් ලංකාවට පැමිණියේ ලංකාවේ සුන්දරත්වය නිසා වුව ත් කොටු පවුර මතට යාමට ඉඩ නොදුන් බව ය.
මීට අමතරව මංගල ඡායාරුප ගැනීමට පැමිණි පිරිස් ද ආපසු හැරී ගිය අතර ඡායාරුප ශිල්පීන් පැවසුවේ, වෙන දා මෙන් ඡායාරූප ගැනීමේ බලාපොරොත්තුවෙන් පැමිණිය ත් පොලිසිය ඊට ඉඩ ලබා නොදුන් බව ය.
