මාරවිල මුදුකටුව පදිංචිව සිටින දෙදරු මවක් අද(21) දහවල් එකට පමණ මාරවිල මූදුකටුව මුහුදු වෙරළේ රැලි පාගමින් සිටියදී මුහුදු රැල්ලකට ගසාගෙන ගොස් මරණයට පත්වී ඇතැයි වාර්තා වෙයි.
මෙසේ මියගොස් ඇත්තේ කොළඹ බත්තරමුල්ල දුටුගැමුණු මාවතේ පදිංචිව සිටි පහලගෙදර ආරච්චිලාගේ චාමි කාංචනා (46) නැමැති දෙදරු මවකි.
ඇයගේ 15 හැවිරිදි පුතාද මුහුදට ගසා ගෙන ගොස් ඇති අතර දෙදෙනාම ප්‍රදේශවාසීන් ගොඩට ගෙන ඇතත් මව මියගොස් තිබුණි. පුතා බේරා ගත හැකි විය.
මෙම මව සහ පුතා 20දා කොළඹ, බත්තරමුල්ලේ සිට දියණිය හා බෑනා වෙසෙන මුදුකටුව රෝමන් පාක් හී නිවසට පැමිණ තිබේ. ඔවුන් 21දා දහවල් විනෝදයට රැලි පෑගීමට මුහුදු වෙරළට ගිය අවස්ථාවේ මෙම අවාසනාවන්ත ඉරණමට මුහුණ පා ඇත.
මේ දින වල මුදු රැල්ල ප්‍රචණ්ඩව පවතින බැවින් මුහුදු රැකියාවද අතහැර දමා ඇතැයි ධීවරයෝ පවසති.
