දිඹුල පොලිස් වසමට අයත් ස්ටොනික්ලිප් වතුයායේ නිවාඩු නිකේතනයකට අනවසරෙන් ඇතුළු වූ තරුණයකු සහ තරුණියක් වස පානය කර ඇති බවත්, ඉන් තරුණිය සංචාරක නිකේතනය තුළදීම ජීවිතක්ෂයට පත්වී ඇති බවත් දිඹුල පතන පොලිසිය පැවැසීය.
මෙසේ මියගොස් ඇත්තේ දිඹුල පොලිස් වසමට අයත් යුනිෆිල්ඩ් වතු යායේ පදිංචි කාර්තිගා නමැති 17 හැවිරිදි තරුණියකි.
මියගිය තරුණිය සහ තරුණයා පෙම් යුවළක් බවත් එම ප්‍රේම සම්බන්ධතාවට දෙපාර්ශ්වයේම මවුපියන් විරුද්ධ වූ නිසා තරුණිය සහ තරුණයා පසුගිය 15වන දා උදෑසන කාලයක් තිස්සේ තාවකාලිකව වසා දමා ඇති නිවාඩු නිකේතනයට අනවසරෙන් ඇතුළු වී වස පානය කර ඇති බව වාර්තා වෙයි.
පසුව පෙම්වතා ඔහුගේ මිතුරකුට සිද්ධිය සම්බන්ධයෙන් දුරකථනයෙන් දැනුම් දීමෙන් පසු දිඹුල පොලිසිය පෙරේදා (16) රාත්‍රියේ එම ස්ථානයට ගොස් පරීක්ෂා කිරීමේදී පෙම්වතිය මියගොස් සිටි බවත්, වස පානය කර අසාධ්‍ය තත්ත්වයේ සිටි පෙම්වතා කොටගල ප්‍රාදේශීය රෝහලට ඇතුළත් කිරීමෙන් අනතුරුව දික්ඔය මූලික රෝහල වෙත ඇතුළත් කර ඇති බවත් දිඹුල පතන පොලිසිය පැවැසීය.
සිද්ධිය සම්බන්ධයෙන් පෙම්වතාගෙන් ලබාගත් ප්‍රකාශය අනුව ප්‍රේම සම්බන්ධතාවට දෙපාර්ශ්වයේම මවුපියන් ඇතුළු ඥාතීන් විරුද්ධ වූ නිසා දිවි හානිකර ගැනීමේ චේතනාවෙන් දෙදෙනාම වස පානය කළ බවට පොලිසියට ප්‍රකාශයක් දුන් බවද දිඹුල පොලිසියේ ස්ථානාධිපති ප්‍රධාන පොලිස් පරීක්ෂක ආනන්දසිරි මහතා සඳහන් කළේය.
