මත්පැන් කාලේ බෝතලය නිෂ්පාදනය තහනම් කිරීම සම්බන්ධයෙන් රජයෙන් ඉල්ලීමක් කළ බව දුම්කොළ හා මධ්‍යසාර පිළිබඳ ජාතික අධිකාරියේ සභාපති ආචාර්ය වෛද්‍ය සමාධි රාජපක්ෂ පවසයි.
ඔහු සඳහන් කළේ, දුම්කොළ හා මධ්‍යසාර පිළිබඳ ජාතික අධිකාරිය විසින් සිදු කරන ලද සමීක්ෂණයක් අනුව මෙම ඉල්ලීම සිදු කිරීම සඳහා ප්‍රමාණවත් දත්ත ලැබීම හේතුවෙන් රජයෙන් මෙම ඉල්ලීම සිදු කළ බව ය.
අදාළ සමීක්ෂණය සඳහා කාණ්ඩ 4ක පුද්ගලයින් සහභාගී වී ඇති අතර එහි මත විමසීමේදී සමස්ත පුද්ගලයින්ගෙන් 72%ක් අරක්කු කාලේ බෝතලය තහනම් කළ යුතු බව පවසා තිබුණු බව ඔහු පැවසීය.
සභාපතිවරයා සඳහන් කළේ, අදාළ සමීක්ෂණය සඳහා මහ ජනතාව, වර්තමානයේ අරක්කු පානය කරන පුද්ගලයින්, ජීවිතයේ කවදා හෝ දවසක අරක්කු පානය කළ පුද්ගලයින් සහ කිසිදු දිනෙක අරක්කු පානය නොකළ පුද්ගලයින් සහභාගි වූ බව ය.
එබැවින් මෙම සමීක්ෂණ දත්ත ද පදනම් කරගෙන අරක්කු කාලේ බෝතලය තහනම් කිරීම සම්බන්ධයෙන් මෙම ඉල්ලීම කළ බව ඔහු පැවසීය.
දුම්වැටි සම්බන්ධයෙන් නම් තනි සිගරට් ඒකක විකිණීම සම්බන්ධයෙන් තහනම් කළ හැකි සේ මත්පැන් සම්බන්ධයෙන් ගත් විට එය කාලේ බෝතලය තහනම් කිරීමට සමාන විය යුතු බව ඔහු අවධාරණය කළ අතර අරක්කු සම්බන්ධයෙන් විමසා බැලීමේදී වැඩි වශයෙන් විකිණෙන්නේ කාලේ බෝතලය වීම ඊට හේතුව බව ද පැවසීය.
මේ අතර, පානය කර ඉවත ලන අරක්කු කාලේ බෝතල් හේතුවෙන් පරිසරයට සහ කුඹුරු ගොවි බිම්වලට බිඳුණු බෝතල් කටු එකතු වීමෙන් ගොවීන්ට සිදු වන තුවාලවීම් ආදිය සලකා බලා පරිසර අමාත්‍යංශයට ද මෙම තහනම සම්බන්ධයෙන් ඉල්ලීමක් කර ඇති බව ඔහු සඳහන් කළේ ය.
තව ද මේ වන විට වසරකට මිලියන 180කට ආසන්න සංඛ්‍යාවක් අරක්කු කාලේ බෝතල් අලෙවි වීම සහ ඉවත ලීම සඳහා ද නිසි වැඩපිළිවෙළක් නොමැති වීමෙන් ඒවා අනිසි ලෙස පරිසරයට මුදාහැරීමෙන් සිදු වන පරිසර හානිය ද මෙම ඉල්ලීම සහා තවත් හේතුවක් බව ඔහු පෙන්වා දුන්නේ ය
