කොළඹ සිට ත්‍රිකුණාමලය, මොරවැව දක්වා ධාවනය කළ ලංගම බස් රථයකින් අනුරාධපුර බලා ගමන් ගත් පෞද්ගලික ආයතනයක කළමනාකරුවෙකු සතුව තිබූ පානීය ජල බෝතලයකට එම බස් රථයේම ගමන් කළ පුද්ගලයෙකු මත් ද්‍රව්‍යක් මුසු කොට එම ජලය ඔහුට පානය කිරීමට සලස්වා සිහිසුන් කර ඔහු පැළඳ සිටි අත් පළඳනාවක් ඇතුළු රුපියල් හාර ලක්ෂ දහතුන් දහස් තුන්සියයක් පමණ වටිනාකමකින් යුත් ස්වර්ණාභරණ, මුදල් ඇතුළු දේපළ සොරා ගෙන ගිය පුද්ගලයෙකු අත්අඩංගුවට ගැනීමට අනුරාධපුර සහ තිරප්පනේ පොලිසිය පරීක්ෂණයක් ආරම්භ කර තිබේ.
එම සිද්ධියට මුහුණ පෑ අනුරාධපුර, විජේපුර ලෙනින් මාවතේ පදිංචි විසි පස් හැවිරිදි වත්තල ප්‍රදේශයේ පෞද්ගලික ආයතනයක සේවයෙහි නියුතු කළමනාකාරවරයා විසින් පසුගිය 11 සහ 12 වන දා අනුරාධපුර සහ තිරප්පනේ පොලිස් ස්ථානවලට ඉදිරිපත් කළ පැමිණිල්ලක් මත පොලිසිය එම විමර්ශනය ආරම්භ කර ඇත.
නිවාඩුවක් ගත කිරීම සඳහා අනුරාධපුර, විජේපුර පිහිටි සිය නිවස වෙත යාමට ඉකුත් 6 වන දා රාත්‍රී සිය නේවාසිකාගාරයේ සිට වත්තල, හැඳල හන්දියේ බස් නැවතුම වෙත පැමිණ ඇති කළමනාකාරවරයා එහිදී දැන හැඳින ගත් පුද්ගලයෙකු සමග ත්‍රීරෝද රථයකින් කොළඹ, කොටුව බලා ගොස් එතැන් සිට ඔවුන් දෙදෙනා ලංගම බස් රථයෙන් අනුරාධපුරය බලා ගමන් කර තිබේ.
මගීන්ට තේ පානය කිරීම සඳහා බස් රථය ඕමාරගොල්ල ප්‍රදේශයේදී ආපන ශාලාවක් අසල නතර කළ අවස්ථාවේ තේ පානය කර ඇති කළමනාකාරවරයා අවශ්‍ය වූ විටක පානය කිරීම සඳහා පානීය ජල බෝතලයක් ද රැගෙන නැවත එම බස් රථයෙන් ම අනුරාධපුර බලා ගමන් කර ඇත.
තම අසුනට යාබද අසුනේ ගමන්ගත් අලුත් හිතවත්කමක් ඇති කර ගත් පුද්ගලයා පානය කිරීම සඳහා තමා අත තිබූ ජල බෝතලය ඉල්ලා ගෙන ඉන් මදක් පානය කිරීමෙන් පසු එය ඔහු අත ම තබා ගෙන බස් රථයේ ගමන් කළ බව පැමිණිලිකරු පොලිසියට පවසා තිබේ.
එසේ ගමන් කරන අතරතුර තමාට නින්ද ගිය බව ත් නැවත අවදිවී අලුත් මිතුරා අත ජල බෝතලය ඉල්ලා ගෙන ඉන් මදක් පානය කළ අවස්ථාවේ එහි අඩංගු ජලයේ අධික කිවුල් රසයක් දැනුණු බවත් ඒ පිළිබඳව සැක සිතූ තමාට තද නිදිමත ගතියක් හට ගැනීමත් සමග අවට තිබු සියලු දෑ බොඳවී දිස් වූ බව ත් ඔහු පොලිසියට පවසා ඇත.
පසුව බස් රථයේ කොන්දොස්තරවරයා අනුරාධපුර නගරය පසුකර ඇති බැවින් බස් රථයෙන් බසින්නේ නැතිදැයි තමාව නින්දෙන් අවදිකොට විමසීමක් කළ විට තමා පැළඳ සිටි පවුම් දෙක හමාරක බරකින් යුත් රුපියල් තුන් ලක්ෂයක් පමණ වටිනා රත්තරන් අත් පළඳනාව නොමැති බව දැනීමෙන් පසු තම සන්තකයේ තිබූ අනිකුත් දෑ තිබේ දැයි වැඩිදුර පරීක්ෂා කිරීමේදී රුපියල් තිස් පන්දහසක් වටිනා ස්මාට් අත් ඔරලෝසුව, රුපියල් හතළිස් පන් දහසක් වටිනා රන් මුදුවක් ඇතුළු තවත් භාණ්ඩ කිහිපයක් අලුත හැඳින ගත් මිතුරා විසින් කොල්ලකා පළා ගොස් තිබුණු බව අනාවරණය වූ බව පැමිණිලිකාර කළමනාකාරවරයා පොලිසියට පවසා තිබේ.
අනතුරුව ඉකුත් 6 වන දා අලුයම් කාලයේ සිදුවූ මෙම සිද්ධිය සම්බන්ධයෙන් වැඩිදුර තොරතුරු සොයා බැලීමේදී සැකකරු අනුරාධපුර නව නගර බස් නවතුම්පොළෙන් බැස එය ඉදිරිපිට පිහිටි ආපන ශාලාවකට ගොස් ගනුදෙනු කරන අයුරු එහි ආරක්‍ෂිත කැමරා පද්ධතියේ තිබී වීඩියෝවක් ද තමා ලබා ගත් බව පවසා ඔහු එය වැඩිදුර විමර්ශන සඳහා පොලිසිය වෙත භාර දී ඇත.
