කජු තොග මිල ඉහළ යෑම නිසා තම ජීවන වෘත්තිය සිදුකරගෙන යෑමට අපහසු බව පවසමින් බටලීයේ තරුණියන් පිරිසක් ඊයේ (01) බටලීය කජු පුරයේදී නිහඬ විරෝධතාවක නිරත වූහ.
බටලීය කජු පුරයේ පවුල් සීයක් පමණ තම ජීවනෝපාය සලසා ගන්නේ කජු ව්‍යාපාරයෙන් බවත් අද වනවිට මහා පරිමාණ කජු ව්‍යාපාරිකයන් වැඩි මිලට කජු මිලදී ගැනීම නිසා කජු කිලෝවක මිල රුපියල් 4,000 දක්වා ඉහළ ගොස් ඇති බවත් ඒ නිසා සුළු පරිමාණ ව්‍යාපාර සිදුකරන බටලීයේ කාන්තාවන් ඉතා අසරණ තත්ත්වයකට පත්ව ඇති බවත් බටලීය එක්සත් කජු ලියන්ගේ සංගමයේ සභාපතිනි නාලිකා අත්තනායක මහත්මිය පැවැසුවාය.
කජු සංස්ථාව හා විෂය භාර අමාත්‍යවරයා මේ ගැන අවධානය යොමු කර කජු සඳහා පාලන මිලක් ඇති කර සුළු පරිමාණ කජු ව්‍යාපාරිකයන් රැකදෙන ලෙසට තමන් බලධාරීන්ගෙන් ඉල්ලා සිටින බවද සභාපතිවරිය පැවසුවාය.
බටලීයේ කාන්තාවන් බොහොමයක් තමන් සතු කනකර පවා බැංකුවල උකස් කරමින් තම ව්‍යාපාරය සඳහා අවශ්‍ය මුදල් සපයා ගත්තද ඉතාමත්ම අපහසුතාවට පත්ව ඇති බව සභාපතිනිය වැඩිදුරටත් පැවැසුවාය.
