පෙම්වතිය අහිමිවීමේ සිත්තැවුලෙන් වවුනියාව, තේක්කවත්ත ප්‍රදේශයේ පදිංචි තරුණයකු වවුනියාව, තේක්කවත්ත ප්‍රදේශයේ දුරකථන සංඥා කුලුනකට පෙරේදා (27) සවස නැඟ සියදිවි හානිකර ගැනීමට ගත් උත්සාහයක් වැළැක්වීමට පොලිසිය සහ ප්‍රදේශවාසීහු එක්ව පියවර ගත්හ.
පොලිසිය, ඥාතීන්, ප්‍රදේශවාසීන් පැමිණ අදාළ තරුණයාට දුරකථන සංඥා කුලුනින් බසින ලෙස ඉල්ලා සිටියද හෙතෙම දුරකථන කුලුනින් බැසීම ප්‍රතික්‍ෂේප කරමින් පැය හතරකට ආසන්න කාලයක් දුරකථන කුලුන මත සිට විරෝධය පාමින් පවසා ඇත්තේ තමන්ගේ පෙම්වතිය නැවත තමන් ළඟට රැගෙන එන තෙක් නොබසින බවටත් එසේ නොවුණොත් කුලුනෙන් පැන සිය දිවි හානිකර ගන්නා බවටත්ය.
අනතුරුව පොලිසිය මැදිහත්වී අදාළ තරුණයාගේ ගැටලුවට විසඳුමක් ලබාදෙන බවට පොරොන්දුවීමෙන් අනතුරුව තරුණයා දුරකථන සංඥා කුලුනින් බසිනු ලැබීමෙන් අනතුරුව එම තරුණයා වැඩිදුර ප්‍රශ්න කිරීම සඳහා පොලිස් භාරයට ගත් අතර එයට විරෝධය දැක්වූ තරුණයාගේ ඥාතීන් විසින් තරුණයාට සාධාරණය ඉටු කර දෙන මෙන් පොලිසියට බල කරමින් ඒ 9 මාර්ගයේදී සිදු කරන ලද උද්ඝෝෂණය පොලිසිය විසින් පාලනය කරනු ලැබීය.
වවුනියාව, තේක්කවත්ත ප්‍රදේශයේ පදිංචි මෙම තරුණයා මීට මාස පහකට පමණ පෙර විවාහ ගිවිස ගැනීමෙන් පසු එම අදාළ තරුණියද තරුණයාගේ නිවෙසේ රැඳී සිට ඇති අතර ඇගේ මව ඇතුළු ඥාතීන් විසින් මීට දින හතකට පෙර තරුණිය බලහත්කාරයෙන් රැගෙන ගිය බවට තරුණයා විසින් වවුනියාව පොලිසිය වෙත පැමිණිල්ලක්ද සිදුකොට තිබේ.
එම පැමිණිල්ලට තමන්ට සාධාරණයක් ඉටු නොවූ බව පවසමින් තරුණයාට ඇති වූ සිත්තැවුල නිසා මෙසේ දුරකථන සංඥා කුලුනට නැඟීම සිදුකළ බවට එම තරුණයා පැවැසීය.
අදාළ තරුණයාගේ ක්‍රියාවත් ප්‍රදේශවාසී තරුණයන් පිරිසක් බීමතින් නොසන්සුන්ව හැසිරීමත් හේතුවෙන් තත්ත්වය පාලනය කිරීමට පොලිසියට දැඩි වෙහෙසක් දැරීමට සිදුවිය.
