කටුනායක ජාත්‍යන්තර ගුවන්තොටුපොළේ සිට ගුවන්තොටුපොළ පරිශ්‍රයෙන් රහසිගතව පිටතට රැගෙන යාමට උත්සාහ කළ රන් බිස්කට් තොගයක් ශ්‍රී ලංකා රේගුවේ මත්ද්‍රව්‍ය පාලන අංශයේ නිලධාරීන් විසින් අත්අඩංගුවට ගත් බව රේගු මාධ්‍ය ප්‍රකාශක සඳහන් කළේ ය.
ඉකුත් 19දා අලුයම ගුවන්තොටුපොළ පිරිසිදු කිරීමේ අංශයේ වයස අවුරුදු 25ක පමණ වැඩ පරීක්‍ෂකයෙකු තම ශරීරයේ ඉතා සූක්‍ෂ්ම ලෙස ග්‍රෑම් 4,848ක් බර රන් බිස්කට් 48ක් මෙලෙස ගුවන්තොටුපොළ පරිශ්‍රයෙන් බැහැරට රැගෙන යාමට උත්සාහ කිරීමේදී මෙලෙස අත්අඩංගුවට ගෙන ඇත.
අත්අඩංගුවට ගත් රන් තොගයේ වටිනාකම රුපියල් මිලියන 70ක් පමණ වේ. අත්අඩංගුවට ගත් රන් බිස්කට් තොගය රාජසන්තක කර ඇති අතර ඉදිරි විමර්ශන කටයුතු රේගු අධ්‍යක්‍ෂ ජනරාල් විජිත රවිප්‍රිය මහතාගේ උපදෙස් පරිදි රේගු දෙපාර්තමේන්තුවේ ඉහළ නිලධාරීන්ගේ අධීක්‍ෂණයෙන් රේගු මත්ද්‍රව්‍ය පාලන අංශයේ නිලධාරීන් විසින් සිදු කරනු ලබයි.
