විලාසිතා සහ නිරූපණ ක්ෂේත‍්‍රයේ තරග නියාමනයට නීති සම්පාදනය කළ යුතු යැයි හිටපු විවාහක ලෝක රූ රැජිණ කැරොලයින් ජූරි මහත්මිය කාන්තා හා ළමා සංවර්ධන, පෙර පාසල් හා ප‍්‍රාථමික අධ්‍යාපන, පාසල් යටිතල පහසුම් හා අධ්‍යාපන සේවා රාජ්‍ය අමාත්‍යයේ ලේකම්වරයාගෙන් ලිපියක් මගින් ඉල්ලීමක් කර තිබෙනවා.
විලාසිතා සහ නිරූපණ ක්ෂේත‍්‍රය අපේ රටේ බිම් මට්ටමේ පිළිගැනීම සහ විශ්වාසය දිනාගැනීමට අපොහොසත්ව ඇති බවත් ඒ සඳහා නීති ප‍්‍රතිසංස්කරණය සහ සම්පාදනය සඳහා ප‍්‍රමුඛත්වය ලබාදිය යුතු බවත් කැරොලයින් පවසනවා.
තරාතිරම් හෝ බෙදීම්වලින් තොරව සියලූම කාන්තාවන් සඳහා සාධාරණ වේදිකාවක් නිර්මාණය කිරීම තම අරමුණ බවත් විලාසිතා සහ නිරූපණ ක්ෂේත‍්‍රය වාණිජ කර්මාන්තයක් බවත් ඇය සඳහන් කර තිබෙනවා.
සියලූම තරගකාරියන් සහ තරගකරුවන් නීතිවේදීන් සමාලෝචනය කරනු ලබන අවබෝධතා ගිවිසුමකට එළඹිය යුතු බව පවසන කැරොලයින් ජූරි කිසිම තරගකාරියක් හෝ තරගකරුවෙක් ලිංගික අපයෝජනයට ලක්නොවිය යුතු බව ද සඳහන් කර තිබෙනවා.
ශ්‍රී ලංකාවේදී පසුගියදා පැවැති විවාහක රූ රැජිණ තරගය ජයගත් පුෂ්පිකා ද සිල්වා මහත්මියගේ කිරුළ එම උත්සව අවස්ථාවේදීම ගැලවීමේ සිද්ධියෙන් පසුව කැරොලයින් ජූරි මහත්මිය ලෝක විවාහක රූ රැජිණ කිරුළ අතහැර දැමුවා.
