මීගමුව මහනගර සභාවේ නාගරික මන්ත්‍රිවරයකු ඇතුළු හතරදෙනකු විසින් ඒත්තුකාලේ බොස්කෝ පුරයේ සිට ත්‍රිරෝද රථයකින් මීගමුව, පෙරියමුල්ලේ මාර්ක් පාරේ හයවැනි පටුමඟේ පිහිටි මන්ත්‍රිවරයාගේ කාර්යාලයට රැගෙනවිත් සිදුකළ පහරදීමේ සිද්ධියක් පිළිබඳව පොලිසිය විසින් විමර්ශන ආරම්භ කර ඇත.
මෙම පහරදීමෙන් තුවාල ලබා ඇත්තේ මීගමුව, ඒත්තුකාලේ පදිංචිකරුවකු බව කියන 53 හැවිරිදි ඇන්ටන් එම්මානුවල් ජෝෂප් නමැත්තෙකි.
රෝහල්ගතව ප්‍රතිකාර ලබන තුවාලකරු ප්‍රකාශ කරන කරුණු අනුව ඉකුත් 21 දින පෙරවරු 7.40ට පමණ ඒත්තුකාලේ පදිංචිව සිටින නිවෙසට පැමිණි නාගරික මන්ත්‍රිවරයා සහ ඔහුගේ සහෝදරයාගේ පුතුන් දෙදෙනකු ප්‍රශ්නයක් සාකච්ඡා කිරීමට ඇති බව පවසා ත්‍රිරෝද රථයකින් තුවාලකරු මන්ත්‍රිවරයාගේ කාර්යාලයට රැගෙන ගොස් ඇත.
එහිදී මන්ත්‍රිවරයාගේ සහෝදරයාගේ පුතකු විසින් හෙල්මට් එකකින් එල්ල කළ පහරදීමකින් හිසට තුවාල සිදුවී ඇති අතර නැවත ත්‍රිරෝද රථයකින් පෞද්ගලික වෛද්‍යවරයකු වෙත රැගෙන ගොස් හිසට සිදුවූ තුවාල සඳහා ප්‍රතිකාර ලබාදී ඇත.
හිසට සිදුවූ තුවාලවලට මැහුම් පහක් යොදා බෙහෙත් දැමූ බවත් තුවාල සිදුවූ ආකාරය වෛද්‍යවරයා විමසූ විට තුවාල සිදුවූයේ පාපැදියෙන් වැටීමෙන් බව මන්ත්‍රිවරයා විසින් වෛද්‍යවරයාට පවසා ඇත.
තුවාලවලට බෙහෙත් දමා නැවත ඒත්තුකාලේ නිවෙසට ගෙනැවිත් දැමූ බවත් පවසන ඇන්ටන් එම්මානුවල් ජෝෂප් මහතා තමන් මේ පිළිබඳව මීගමුව පොලිසියට මෙම මස 21 දින 10.30ට පමණ පැමිණිලි කළ බවද පවසයි.
