පින්නවල අලි අනාථාගාරය තුළ වසර ගණනක් තිස්සේ අසනීපව ප්‍රතිකාර ලබමින් සිටි ‘භාරතී කෙනෙර’ මිය ගොස් තිබේ.
පින්නවල අලි අනාථාගාරය තුළ සිදු වූ 45 වන අලි උපත ලෙස අමාලි නම් කෙනෙරට දාව 2007 වර්ෂයේ ජනවාරි මස 10 වන දින භාරතී උපත ලැබුවා ය.
කලක සිට රෝග ලක්ෂණ පෙන්නුම් කිරිම හේතුවෙන් 2013 වර්ෂයේ සිට ප්‍රතිකාර ලබමින් සිටි භාරතී කෙනෙර 2014 වර්ෂයේදී මයුරි නම් ඇතින්නියගේ පහර දීමකට හසුව දැඩි ලෙස ඔත්පල වී ඇති අතර අසාමාන්‍ය ලෙස වර්ධනය බාලවීම සහ අක්ෂී දුර්වලතා වැනි රෝග තත්ත්වයන් සඳහා ප්‍රතිකාර ලබමින් සිටියදී මිය ගොස් ඇත.
අලි අනාථාගාරයේ පශු වෛද්‍ය ඒකකයේ නිලධාරීන්, සත්ත්ව අංශ භාර නිලධාරීන්, හස්ති පාලක නිලධාරි හා කාර්ය මණ්ඩලය විසින් අවශ්‍ය ප්‍රතිකාර සහ පෝෂණ අවශ්‍යතා ආදිය සලසමින් භාරතී කෙනෙර වෙනුවෙන් ජීවදාන පින්කමක් පවත්වා ආශිර්වාද කිරීමට ද කටයුතු කර තිබේ.
මියගිය භාරතී කෙනෙර වෙනුවෙන් සිදුකරන ලද පශ්‍චාත් මරණ පරීක්ෂණය පේරාදෙණිය පශු වෛද්‍ය ඒකකයේ පසු වෛද්‍ය නිලධාරී මහේෂ් අකලංක මහතා ප්‍රමුඛ පශු වෛද්‍ය නිලධාරී කණ්ඩායමක් මගින් සිදු කර තිබේ.
