කෙසෙල් ගෙඩියක මිල වැඩිබව පවසමින් ප්‍රචණ්ඩකාරී ලෙස හැසිරුණු පාරිභෝගිකයෙකු හෝටල් සේවකයෙකුට එල්ල කළ බෝතල් පහරකින් එහි සේවකයෙකු මරණයට පත්වූ පුවතක් කුරුණෑගලින් වාර්තා වනවා.
කෙසෙල් ගෙඩියක් මිලදී ගැනීම සඳහා කුරුණෑගල පැරකුම්බා වීදියේ හෝටලයකට පැමිණි පාරිභෝගිකයෙකුට වෙළෙඳ සැල් හිමියා පවසා ඇත්තේ එහි මිල රුපියල් 30ක් බවයි.
ඒ බව අසා දැඩි ලෙස කෝප වූ අදාළ පුද්ගලයා හෝටල් හිමියා සහ සේවකයින් සමඟ බහින්බස් වීමක් ඇති කර ගන්නා අතර, පසුව ඔහු ඉතා ප්‍රචණ්ඩ ලෙස හැසිරෙමින් ඔවුන්ට පහරදීමට උත්සාහ කරන ආකාරය CCTV කැමරාවක මෙලෙසට සටහන්ව තිබුණා.
පසුව ඉවත් යන ඔහු යළි බීර බෝතලයක් රැගෙන පැමිණ එය කඩා ආපනශාලා සේවකයින්ට පහරදීමට උත්සාහ කරනවා.
ප්‍රහාරයෙන් බේරීම සඳහා හෝටලයේ පිරිස දිවයන අතර, සේවකයින් පිරිසක් දිව යන්නේ දුරකතන අලෙවිසැලක් වෙතයි.
ඔවුන් පසුපස එළවායන ප්‍රචණ්ඩකාරීව හැසිරෙන පුද්ගලයා තවත් පුද්ගලයෙකුට බෝතලයෙන් ඇන බරපතල තුවාල සිදු කරනවා.
බරපතල තුවාල ලැබූ හෝටල් සේවකයා කුරුණෑගල රෝහලට ඇතුලත් කළද ඔහු ඒ වනවිටත් මියගොස් තිබුණා.
තුවාල ලැබූ සැකකරුද පොලිස් අත්අඩංගුවට ගෙන ඇති අතර, ඔහු පොලිස් ආරක‍ෂාව මැද කුරුණෑගල රෝහලේ ප්‍රතිකාර ලබනවා.
සිද්ධිය සම්බන්ධයෙන් කුරුණෑගල පොලිසිය පරීක‍ෂණ පවත්වනවා.
