කොළඹ කොටුව සිට නානුඔය දක්වා ධාවනය වූ වයිස්රෝයි දුම්රියේ වාෂ්ප එන්ජිම හැටන් දුම්රිය ස්ථානයේදී ඊයේ (11) කාර්මික දෝෂයකට ලක්වී පැය දෙකකට අධික කාලයක් ප‍්‍රමාද වීමෙන් එහි ගමන් ගත් රුසියාවේ දෙවැනි කෝටිපති ව්‍යාපාරිකයා සහ ඔහුගේ පවුලේ සාමාජිකයෝ ද දැඩි අපහසුතාවට පත් වූ බව මාධ්‍ය වාර්තා කරනවා.
රුසියාවෙන් මෙරටට සංචාරයක් සඳහා පැමිණ සිටින එරට දෙවැනි කෝටිපති ව්‍යාපාරියකු සහ ඔහුගේ පවුලේ සාමාජිකයන් මෙන්ම පෞද්ගලික ආරක්ෂක අංශයේ අටදෙනකු ද සංචාරක මණ්ඩලයේ අනුමැතියෙන් යුතු වාෂ්ප එන්ජිම සහිත වයිස්රෝයි දුම්රියේ කොළඹ කොටුව සිට නානුඔය දුම්රිය ස්ථානය දක්වා ගමන් කිරීමට දුම්රිය දෙපාර්තමේන්තුවෙන් මුදල් ගෙවා එම දුම්රිය වෙන් කරගෙන තිබුණා.
එම වාෂ්ප එන්ජිම සහිත වයිස්රෝයි දුම්රිය 10 වැනිදා නාවලපිටිය දුම්රිය ස්ථානයේ ගාල් කර ඊයේ (11 ) නාවලපිටිය සිට නානුඔය දුම්රිය ස්ථානය දක්වා ධාවනය වන අවස්ථාවේ හැටන් දුම්රිය ස්ථානයට ආසන්නයේ වාෂ්ප එන්ජිම කාර්මික දෝෂයකට ලක්වී තිබෙනවා.
මේ සම්බන්ධයෙන් රුසියානු කෝටිපති ව්‍යාපාරිකයා දැඩි ලෙස උරණ වී කෑකෝ ගසන්නට වූයෙන් කාර්මික දෝෂයකට ලක් වූ වයිස්රෝයි දුම්රියේ වාෂ්ප එන්ජිම හැටන් දුම්රිය ස්ථානයේදී ගලවා ඉවත් කර ඞීසල් එන්ජිමක ආධාරයෙන් රුසියානු ව්‍යාපාරිකයා සහ ඔහුගේ පවුලේ සාමාජිකයන් ඇතුළු පිරිස රැගත් වයිස්රෝයි දුම්රිය නානුඔය දුම්රිය ස්ථානය දක්වා ධාවනය කර ඇති බව වාර්තා වනවා.
එම දුම්රිය පස්වරු 12.15 ට ගමනාන්තය වෙත පැමිණීමට නියමිත වුවද දුම්රිය පැමිණ ළඟා වී ඇත්තේ පස්වරු 2.25ට පමණයි.
