එංගලන්ත සහ වේල්ස් ක්‍රිකට් පාලක මණ්ඩලය මඟින් පැවැත්වීමට සැලසුම් කර ඇති පන්දු 100 ක්‍රිකට් තරගාවලියේ ක්‍රීඩක වෙන්දේසිය මෙම මස 23 වැනිදා පැවැත්වීමට නියමිතයි.
ඒ සඳහා ශ්‍රී ලංකා ක්‍රීඩකයන් 18 දෙනෙකු ඉදිරිපත්ව තිබෙනවා.
ස්ටර්ලිං පවුම් 40,000ක මූලික ලංසුවක් සඳහා ශ්‍රී ලංකා ජාතික කණ්ඩායම නියෝජනය කරන ක්‍රීඩකයන් 5 දෙනෙකු සුදුසුකම් ලබා තිබීම කැපී පෙනෙන සිදුවීමක් වනවා.
ධනංජය ද සිල්වා, නිරෝෂන් දික්වැල්ල, කුසල් ජනිත් පෙරේරා, තිසර පෙරේරා සහ ඉසුරු උදාන එම ක්‍රීඩකයන් වනවා.
ස්ටර්ලිං පවුම් 32,000ක මූලික ලංසුව හිමිව ඇති ශ්‍රී ලංකා ක්‍රීඩකයන් වන්නේ තික්ෂිල ද සිල්වා සහ ලසිත් ඇඹුල්දෙණියයි.
මූලික ලංසුවකින් තොරව ක්‍රීඩක වෙන්දේසියට ඉදිරිපත්ව ඇති ශ්‍රී ලංකා ක්‍රීඩකයන් වන්නේ වනිඳු හසරංග, අකිල ධනංජය, අවිෂ්ක ප්‍රනාන්දු, අසේල ගුණරත්න, ධනුෂ්ක ගුණතිලක, ළහිරු කුමාර, කුසල් මෙන්ඩිස්, භානුක රාජපක්ෂ, දසුන් ශානක, ළහිරු තිරිමාන්න සහ තිලාන් වලල්ලාවිටයි.
තිලාන් වලල්ලාවිට ශ්‍රී ලංකා සම්භවයක් සහිතව මිඩ්ල්සෙක්ස් ප්‍රාන්තය නියෝජනය කරන ක්‍රීඩකයෙකි.
පානදුර ලීඩ්ස් ජාත්‍යන්තර පාසල නියෝජනය කරමින් මෙරට පාසල් ක්‍රිකට් පිටියට පිවිසි තිලාන් වලල්ලාවිට 2010 වසරේදී විදෙස් ගතවනතුරු පාසල් ක්‍රිකට් තරගවල දී දස්කම් දක්වනු ලැබුවා.
වමත් මද වේග පන්දු යවන්නකු ලෙස ක්‍රිකට් දිවිය ඇරඹූ තිලාන් පසුව වමත් පා දඟ පන්දු යවන්නකු බවට පත් වුණා.
2015 වසරේදී මිඩ්ල්සෙක්ස් දෙවැනි පෙළ වරම් ලැබූ තිලාන් දැක්වූ දක්ෂතා හේතුවෙන් 2016 වසරේදී මිඩ්ල්සෙක්ස් ප්‍රාන්තයේ දක්ෂතම යොවුන් ක්‍රීඩකයා ලෙස ද සම්මාන ලැබුවා.
මෙවර IPL තරගාවලිය සඳහා ශ්‍රී ලංකා ක්‍රිකට් ක්‍රීඩකයන් කිසිවෙකුත් සුදුසුකම් ලැබීමට සමත් වුණේ නැහැ..
