ආසියානු සංවර්ධන බැංකුවේ ණය ආධාර යටතේ යෝජිත දුම්රිය ප්‍රවේශ පත්‍ර නිකුත් කිරීමේ ව්‍යාපෘතිය මෙරට සමාගමක් වන ශ්‍රී ලංකා ටෙලිකොම් සමාගම නොමිලේ සිදු කිරීමට කැමැත්ත පළ කර තිබියදී චීන සමාගමකට දීමට යෝජනා කරමින් සිටින බව එහි ආරංචි මාර්ග පවසයි.
මින් මෙරටට අහිමි වීමට යන මුදල් රුපියල් මිලියන 22 වඩා වැඩි බව එහි වෘත්තීය සමිති පෙන්වා දෙයි.
මෙම ව්‍යාපෘතියේ මුළු වියදම ඇමරිකානු ඩොලර් මිලියන 22 කට ආසන්නය. මෙම ව්‍යාපෘතියේ වගකීම් කාල සීමාව වසර 8කි.
මෙම ආයෝජනයට සාපේක්ෂව දුම්රිය ප්‍රවේශ පත්‍ර නිකුත් කිරීම සදහා දිනකට යන වියදම අවම වශයෙන් රුපියල් මිලියන 1.2 කට වඩා වැඩිය.
මෙම ව්‍යාපෘතිය ක්‍රියාත්මක කළහොත්, දුම්රිය ධාවනය වූවත් නැතත් ශ්‍රී ලංකා දුම්රිය දෙපාර්තමේන්තුව මෙම ආයෝජනය සාධාරණීය කිරීම සඳහා දිනකට රුපියල් මිලියන 1.2 කට වඩා වෙන් කළ යුතුය.
මේ ව්‍යාපෘතිය මෙරට ටෙලිකොම් සමාගම හරහා සිදු කළ යුතු බව ප්‍රවාහන ඇමැති ගාමිණී ලොකුගේ මහතා ඇතුළු බලධාරීන් කැමැත්ත පළ කර තිබියදී මෙලෙස මුදල් විදේශ රටක් වන චීනයට ලබා දීමට අදිසි හස්තයක් ක්‍රියාත්මක වන බවත් මෙවැනි ව්‍යාපෘති සිදු කිරීම රටක ආයෝජනද නැතහොත් අපරාධයක්ද යන්න සොයා බැලිය යුතු බවත් දුම්රිය දෙපාර්තමේන්තුවේ වෘත්තීය සමිති පෙන්වා දෙයි.
