මුහුණ පොත හරහා ඇති වූ දැන හැඳිනගැනීමක් මත බාලවයස්කාර දැරියක නීත්‍යානුකූල භාරකාරත්වයෙන් පැහැරගෙන ගොස් අතවර කළ අම්බලන්තොට තරුණයකු ලබන 24 දා දක්වා රක්ෂිත බන්ධනාගාර ගත කරන ලෙස තිස්සමහාරාම මහෙස්ත‍්‍රාත් හා අතිරේක දිසා විනිසුරු කාංචනමාලී සුසන්තා ගුණසේකර මහත්මිය පසුගිය (10) නියෝග කර තිබෙනවා.
14 හැවිරිදි සිය දියණිය පසුගිය 08 දා සිට නිවසින් අතුරුදන් වී ඇති බවට දැරියගේ පියා විසින් ලූණුගම්වෙහෙර පොලිසියට පැමිණිල්ලක් ඉදිරිපත් කර තිබෙනවා. අත්අඩංගුවට පත් සැකකරු හා බාලවයස්කාරියගෙන් සිදුකළ ප‍්‍රශ්න කිරීමේදී අනාවරණය වී ඇත්තේ සැකකරු හා බාලවයස්කාරිය අතර මුහුණ පොත හරහා වසර එක හමාරක පමණ කාලයක සිට පේ‍්‍රම සම්බන්ධතාවක් පවත්වාගෙන ගොස් ඇති බවයි.
දැරියගේ ඉල්ලීම අනුව සැකකරු දැරියගේ නිවස අසලට ගොස් තිබෙන අතර එම අවස්ථාවේදී ඇය පෑන් දෙකක් රැගෙන ඒමට කඬේට යන බව පවසා නිවසින් එළියටවිත් සැකකරු සමග පලාගොස් තිබෙනවා.
දුරකතන ඇමතුම් වාර්තා හරහා සිදුකළ විමර්ශනයකට අනුව සැකකරු ප‍්‍රදේශයේ පිහිටි වගාබිමක ගසක් උඩ ඉදිකර තිබූ පැලක සිටියදී පෙරේදා අත්අඩංගුවට ගෙන මහෙස්ත‍්‍රාත් අධිකරණයට ඉදිරිපත් කර තිබෙනවා. එහිදී මහෙස්ත‍්‍රාත්වරිය සැකකරු ලබන 24 දා දක්වා රක්ෂිත බන්ධනාගාරගත කෙරුණු අතර බාලවයස්කාර දැරිය අධිකරණ වෛද්‍ය නිලධාරීවරයා හමුවට ඉදිරිපත් කර වාර්තාවක් ලබාදෙන ලෙස නියෝග කර තිබෙනවා.
