හැටන් නගරයේ පවත්වාගෙන යන සංචාරක නිකේතන කිහිපයක සහ ආපන ශාලා කිහිපයකට වෛද්‍ය සහතිකපත් නිකුත් කිරීමට ඊසි කෑෂ් ක‍්‍රමයට මුදල් බැර කරන ලෙසට කර ඇති ඉල්ලීමක් සම්බන්ධයෙන් හැටන් දික්ඔය නගර සභාව වෙත පැමිණිලි ලැබී ඇති බව වාර්තා වනවා.
හැටන් නගරයේ සංචාරක නිකේතන සහ ආපන ශාලා කිහිපයකට මහජන සෞඛ්‍ය පරීක්ෂකවරයෙක් වශයෙන් හඳුන්වාදුන් පුද්ගලයකු දුරකථන ඇමතුම් ලබාගෙන එම සංචාරක නිකේතනවල සහ ආපනශලා වල අඩුපාඩුකම් රාශියක් තිබෙන බවත්, එවන් තත්ත්වයක් මත සංචාරක නිකේතන සහ ආපනශාලා කොවිඞ් 19 වෛරසය පැතිර යෑමේ අවදානම සමග පවත්වාගෙන යෑමට නොහැකි බවත්, එම දුරකථන ඇමතුම ලබාදුන් පුද්ගලයා විසින් සංචාරක නිකේතනයේ අයිතිකරුවන්ට සහ ආපන ශාලා හිමියන්ට දැනුම් දී ඇති බවයි වාර්තාවන්නේ.
කොවිඞ් 19 වෛරසය හමුවේ සංචාරක නිකේතන සහ ආපන ශාලා පවත්වාගෙන යෑමට ඒ ශ්‍රේණියේ වෛද්‍ය සහතිකයක් අනිවාර්යය බවත්, වෛද්‍ය සහතිකය නිකුත් කිරීමට විවිධ මුදල් ගණන් සඳහන් කරමින් එම මුදල ඊසිකෑෂ් ක‍්‍රමයට බැර කරන ලෙසට එම ව්‍යාජ මහජන සෞඛ්‍ය පරීක්ෂකවරයා තමන්ට දැනුම් දුන් බව එම සංචාරක නිකේතන හිමිකරුවන් කියා සිටියි.
