බොලිවුඩ් පුරවරයේ විවාහ වැඩි ප්‍රමාණයකට එතරම් ආයුෂ නැති බැව් නොදන්නා කෙනෙක් නැත. බොහෝ ආදරයෙන් හා සාමයෙන් යුග දිවිය ගෙවන අය දුර්ලභය. එමෙන්ම ඔවුහු අනෙක් අයගේ ඇගයීමටත් පාත්‍ර වෙති. ෂාරුක්-ගෞරි එවන් බුහුමන් ලබන ආදර්ශමත් අඹුසැමි යුවළකි. 1991 දී විවාහ වූ තිදරු යුවළ ඔක්තෝබර් 25 දා ඔවුන්ගේ විවාහයේ 29 වන සංවත්සරය සැමරුවා.
ජනප්‍රිය නිළියක වන ෆරීඩා ජලාල් මෙහෙයවන වැඩ සටහනකට එක් වූ ෂාරුක් ඛාන් සිය විවාහ දිනයේ ඇතැම් මතකයන් සිහිපත් කළේ සියල්ලන් සිනා ගන්වමිනි.
“අපි විවාහ වුණේ හින්දු චාරිත්‍රානුකූලව.. ගෞරි ගේ පවුලේ හැමෝම පරණ තාලේ මිනිස්සු. ඇත්තටම මම ඒ සාම්ප්‍රදායික මිනිස්සු වගේම ඔවුන්ගේ විශ්වාසත් හුඟාක් අගය කරනවා. ඔවුන් ඒක දැනගෙන හිටියේ නෑ.. මම එකයි කාලට විතර උත්සව ශාලාවට යනකොට නෑදෑයො හැමෝම මගෙ දිහාවෙ බැලුවේ නුහුරට කියලා මට තේරුණා.. “එයා මුස්ලිම් කොල්ලෙක්.. එයා ගෞරි එයාගෙ ආගමට හරවා ගනියි.. එයාගෙ නමත් වෙනස් කරයි..” වගේ දේවල් කියනවත් මට ඇහුණා.. ඉතින් මම හිතුවා එයාලට පුංචි විහිළුවක් කරන්න ඕන කියලා.. මම ගෞරිට කිව්වා බුර්කාවක් අඳින්න කියලා..”
ඔහු කීවේ සිනාසෙමිනි.
