දත් ගලවන්නට පැමිණි පුද්ගලයකුට ‘කොවිඞ්-19’ ආසාදනය වී ඇතැයි තහවුරු වීමෙන් කටුගස්තොට තිත්තපජ්ජල ග‍්‍රාමීය රෝහලේ දන්ත වෛද්‍ය ප‍්‍රතිකාර ඒකකයේ වෛද්‍යවරයකු හා හෙද කාර්ය මණ්ඩලය නිරෝධායනයට යොමුකර තිබෙනවා.
ගලගෙදර ප‍්‍රදේශයේ පදිංචි ‘කොවිඞ්-19’ ආසාදිත පුද්ගලයා රෝහලේ දන්ත වෛද්‍ය සායනයට පැමිණ හෑදෙණිය ප‍්‍රදේශයේ පෞද්ගලික වෛද්‍ය මධ්‍යස්ථානයකින් ද ප‍්‍රතිකාර ලබා ගෙන ඇත. රුධිර පරීක්ෂණයක් සඳහා ඔහු වෛද්‍ය රසායනාගාර දෙකකට ද ගොස් තිබෙන බව පරීක්ෂණ මගින් හෙළිව තිබේ. මෙම සියලූ ස්ථාන තාවකාලිකව වසා දමා ඒවායෙහි සේවකයින් ස්වයං නිරෝධායනයට යොමු කිරීමට සෞඛ්‍ය අංශ පියවර ගෙන ඇති බවයි වාර්තා වන්නේ,
කටුගස්තොට පොලිස් වසමට අයත් රණවන හා වැරැුල්ලගම කරඬුවාවල පදිංචි දෙදෙනකු ස්වයං නිරෝධානයට යොමුව සිටියදී පසුගිය 06 වැනිදා හදිසියේ මරණයට පත්වූ අතර ඔවුන්ට කොවිඞ් ආසාදනය වී නොමැති බව පශ්චාත් මරණ පරීක්ෂණයේදී වාර්තා වී තිබේ. එසේ වුවත් ඔවුන්ගේ අවසන් කටයුතු කොරෝනා රෝගියකුගේ අවසන් කටයුතු සිදුකිරීම සඳහා සෞඛ්‍ය අංශ ලබාදී තිබෙන නිර්නායක අනුව සිදු කිරීමට නියමිතයි.
