තම යතුරුපැදියෙන් ගම්පහ දිස්ති‍්‍රක්කයේ ගම්මාන හතරක සැරිසරමින් එම ගම්මානවල මත්ලෝලීන්ට ඊසි කෑෂ් ක‍්‍රමය මත මත්කුඩු විකුණා මාස තුනක කාලයක් තුළ කෝටිපතියකුවූ ‘හපුවලානේ සුප්පා’ නමැති මහා පරිමාණයේ ජාවාරම්කරු විසින් අලෙවිය සඳහා සඟවා ළඟ තබාගත් රුපියල් දසලක්‍ෂයක් පමණ වටිනා (වර්තමාන මිල* මත්කුඩු ග‍්‍රෑම් 62 ක් සමග අත්අඩංගුවට ගැනීමට මීගමුව දිස්ති‍්‍රක් කොට්ඨාස අපරාධ විමර්ශන ඒකකයට අනුයුක්ත උ.පො.ප. අයේෂ් පෙරේරා මහතා ඇතුළු එම ඒකකයේ නිලධාරීහු 1 දා සමත්වූහ.
අත්අඩංගුවට ගත් සැකකරු සුපුන් නොහොත් හපුවලානේ සුප්පා නමැති එක්දරු පියෙකි. මොහු දූනගහ හපුවලානේ නිවෙස්හිමි ස්ථිර පදිංචිකරුවකු වුවත් ඔහු තම ජාවාරම පහසුවෙන් සංවිධානාත්මකව පවත්වාගෙන යාම සඳහා මීගමුව කුරණ සිසිල් පටුමග ප‍්‍රදේශයේ නිවසක් කුලියට ගෙන තම බිරිඳ සහ දරුවා සමග පදිංචිව ඇත. සැකකරු විසින් තම ජාවාරම සිදුකොට ඇත්තේ දිවුලපිටිය,
මිනුවන්ගොඩ, දූනගහ සහ මරඳගහමුල යන ගම්මානවල පදිංචි මත්ලෝලීන් ඉලක්ක කොට ගෙනය. මත්ලෝලීන් විසින් සැකකරුගේ බැංකු ගිනුමේ මුදල් තැන්පත්කොට ඒ බව සැකකරුට දැන්වීමෙන් අනතුරුව සැකකරු තම යතුරුපැදියෙන් පැමිණ තම මත්ලෝලී පාරිභෝගිකයන් විසින් සඳහන් කරන ස්ථානවල මත්කුඩු තබා ඒවා මත්ලෝලීන් අතට පත්කරන බව විමර්ශනවලදී අනාවරණයවී ඇත. මොහු බොහෝ විට මත්කුඩු තබා යන්නේ විදුලි කණු යට බව හෙළිදරව් වී ඇත. අත්අඩංගුවට ගත් සුපුන් නොහොත් ‘හපුවලානේ සුප්පා’ නමැති සැකකරුගේ බැංකු ගිණුම් පොත පරීක්‍ෂා කළ අවස්ථාවේ සැකකරු පසුගිය මාස තුනක පමණ කාලයක් තුළ හෙරොයින් ජාවාරමේ යෙදී රුපියල් කෝටි 3 කට අධික මුදලක් බැංකු ගිණුමේ සංසරණයවී ඇති බවත් තවදුරටත් අනාවරණයවී ඇත.
මාස 03 කින් කෝටිපතියෙක් වූ හපුවලානේ ‘කුඩු සුප්පා’ අත්අඩංගුවට
© 2020 Gossip King.