මෙවර උසස් පෙළ විභාගයට පෙනී සිටි හතරලියද්ද පොල්වත්ත ප‍්‍රදේශයේ පදිංචි සිසුවකු 02 වැනිදා රාත‍්‍රී 11.00ට පමණ පෙම්වතිය හමුවීමට කුඹුරක් මැදින් යමින් සිටියදී ඌරන්ට අටවා තිබූ විදුලි රැහැනක ගැටී විදුලි සැර වැදීමෙන් මරණයට පත්ව තිබෙනවා.
මෙසේ මියගොස් ඇත්තේ මහනුවර පිරිමි විද්‍යාලයක අධ්‍යාපනය ලබමින් සිටි 19 හැවිරිදි සිසුවෙක්.
මියගිය සිසුවා 02 වැනිදා රාත‍්‍රියේ පෙම්වතියට දුරකථන ඇමතුමක් ගෙන ඔහුගේ නිවසේ සිට මීටර 500ක පමණ දුරින් පිහිටි තරුණියගේ නිවසට ගොස් තිබෙන අතර පෙම්වතිය සමග දුරකථනයෙන් කතා කරමින් යන අතර විදුලි සර වැදුණු තරුණයා වෙල්යායේ ඇද වැටී තිබෙනවා. එක් වරම කෙඳිරිලි හඬක් සමග පෙම්වතා නිහඬ වීම නිසා ඔහුට යම් කරදරයක් වන්නට ඇතැයි සිතූ පෙම්වතිය නිවසින් පිටතට පැමිණ වෙල්යායට පැමිණ තිබෙනවා. එම අවස්ථාවේ ඇය පෙම්වතාගේ දුරකථනයට යළි ඇමැතුමක් ගනිත්දී ඔහුගේ දුරකථනයෙන් නික්මුණු විදුලි ආලෝකය මගින් ඔහු වෙල්යායේ වැටී සිටිනු දැක තිබෙනවා.
එම ස්ථානයට ගිය පෙම්වතියට ද විදුලි සැර වැදී ඇති නමුත් ඇයට කිසිදු හානියක් සිදුව නැති බව පොලිසිය පවසනවා.
මෙම කුඹුරුයාය පුද්ගලයින් සිව්දෙනකුට අයත් බවත් ඔවුන් සියලූ දෙනාගේ එකඟතාව මත ප‍්‍රදේශයේ පුද්ගලයකු සතුන් දඩයම් කිරීම සඳහා වෙල්යායට විදුලි රැහැනක් ඇද තිබෙන බවත් පොලිස් පරීක්ෂණවලින් අනාවරණය වී තිබෙනවා.
කුඹුරු කොටස්වල හිමිකරුවන් සිව්දෙනා සහ විදුලි රැහැන් අදින ලද පුද්ගලයා හතරලියද්ද පොලිසියට රැගෙන විත් ප‍්‍රකාශ සටහන් කරගත් බව මහනුවර ජ්‍යෙෂ්ඨ පොලිස් අධිකාරී සුදත් මාසිංහ මහතා පැවසුවා.
සිද්ධිය පිළිබඳ පරීක්ෂණ පවත්වයි.
